हरिहरपुरगढी गाउँपालिकामा खोलाले बगाएर छोराको मृत्यु, आमा वेपत्ता

सिन्धुली, ९ भदौं । सिन्धुलीको हरिहरपुरगढी गाउँपालिकामा खोलाले बगाएर एकजनाको मृत्यु भएको छ भने अर्का एक जना बेपत्ता भएका छन् । 

हरिहरपुरगढी गाउँपालिका ६ रागेचुलीका २८ बर्षका राजकुमार गोलेको खोलाले बगाएर मृत्यु भएको हो । उनका आमा ५७ बर्षकी माया गोले तीन देखि बेपत्ता भएका छिन् । 

गएको भदौं ७ गते आमा माया र छोरा राजकुमार घरभन्दा करिब १ किलोमिटर उत्तर पुर्वमा रहेको ब्रमठाकुर सामुदायिक वनमा घाँस काट्न गएका थिए । 

आज (शनिवार) सम्म आमा छोरा घर नफर्केपछि स्थानिय र प्रहरीले खोज तलास गर्नेक्रममा हरिहरपुरगढी गाउँपालिका ६ को क्यानखोला र खड्कुलेखोलाको दोभानमा छोरा राजकुमारको शव फेला परेको जिल्ला प्रहरी कार्यालय सिन्धुलीले जनाएको छ । 

उनका आमा मायाको खोजी कार्य भईरहेको सिन्धुलीका प्रहरी निरिक्षक केशव कटुवालले जानकारी दिनुभयो ।